Friday, June 21, 2013

Sy

Nog voordat ek haar eers ontmoet het, het ek reeds die kleur van haar oë, die reuk van haar parfuum en die manier wat die son deur haar hare speel gememoriseer. Ek onthou die eerste keer wat ek aan haar gevat het, my vingers het perongeluk oor haar hand gestreël soos ek my aansteker vir haar gegee het en sy het vir my gekyk. Nie net 'n vlugtige kyk nie, maar reguit deur my gekyk tot in die kern van my menswees. In daardie oomblik het ek geweet sy gaan myne wees, of, as ek nou terugkyk, ek hare. Dit was lank terug al gewees, ek is nou ouer en ek weet nie waar sy haarself nou bevind nie. Eendag hoop ek vir nog so 'n engel om my asem weg te slaan in 'n soortgelyke, onskulige, flietende oomblik.

Sunday, January 20, 2013

Daai Winternag

Jy het daar gestaan met jou vriendinne in die shop,
as ek terugdink wonder ek wat het ooit van ons geword?
Ek was nuut in hierdie dorp, die seun met die hartseer oë,
ek was nie reg om op te gee nie, nie reg vir jou nie,
soos ek terugkyk op daardie aande;
die motorfiets se sitplek, die vuur op die horison,
ek voel die hitte, ek sien die lig.
ek sien jou lyf in my arms gevou,
ek mis die aande saam met jou
en die verlange knou my nou.
Ons jaag die skadus deur daai winternag
deur die strate van die hoëveld
en vir 'n oomblik was ek vry
en die rede was dalk jy.

Ek gooi jou weg met jou verspotte hart,
want ek is stukkend, selfsugtig, nog nie reg vir dit!
En ek voel steeds die messteek regdeur my hart,
jy hardloop weg en ek kyk net hoe jy gaan.
Jy was so seer en ek so kwaad.
Ek moes daar en dan omdraai en jou keer,
maar jy moes jouself net seker red.
Al wat ek gesoek het was toe eintlik jy,
jy was so baie kere daar vir my.
Praat van die verkeerde tyd met die regte vrou
Ons jaag die skadus deur daai winternag
deur die strate van die hoëveld
en vir 'n oomblik was ek vry
en die rede was wel jy.

Die storm breek om my weg en ek sien dit nou,
in my drome jaag ek steeds jou gesig.
My warboel meisie, ek staan nou hier;
sweet op my vel,
hierdie liefde brand in my hart,
so warm soos daai wintervuur.
Ek staan hier en ek weet ek is te laat.
Jou hartseer pyn was als my skuld,
net soos die messsteek deur my hart
as jy weghardloop, vinnig, ver van my.
Ons jaag die skadus deur daai winternag
deur die strate van die hoëveld
en vir 'n oomblik was ek vry
en die rede was altyd jy.